Materialije

dołhi powjaz

ručny zwónčk

Přewjedźenje

Dźěći lubuja rěčne hry a hrónčka. Hrónčka sej wot dźěći žadaja, na zwuk rěče kedźbować. Wobchadźenje (Umgang) z hrónčkami ma dźěćom wuwědomić, zo nima rěč jenož wobsah, ale tež formu, kotraž je słyšeć. Předčitajće hrónčko a akcentujće słowa. Po tym hrónčko zhromadnje z dźěćimi linku po lince wospjetujće. Tempo ma so po dźěćoch, tak zo móža wšitcy jednotliwe linki sobu powědać. Hdyž dźěći hrónčko wobknježa, je na wšelake wašnje wospjetujće. Hrónčko na přikład šeptajće, jara wótře prajće abo přiběrajo wótřišo a woteběrajo mjelčišo. Dźěći njech hrónčko tež wospjetuja, z tym zo jedne dźěćo po druhim stajnje jednu linku praji.

Na našej wulkej wišninje,

wjele, wjele wišnjow je.

Rjane słódke čerwjene,

w lěću rady šćipamy.

Paduši žno łakaja

a na wišnje čakaja.

Wěš kak wone rěkaja,

tute čorne ptačiska?

To su škórcy, chłóšćate,

přileća tu k swačinje.

Zrawe wišnje šlapaja,

słódke płody lubuja.

To sej lubić njedamy,

šerjenje sej zdrasćimy,

zo so škórcy naboja,

krakajo zas wotleća.

Bórze pak so nawróća,

žadyn strach wjac nimaja,

tuž njech je jim wišnina

w lěću krótka hospoda.

hospoda – Rastplatz zum Verweilen

Rozšěrjenje

K rymowance hodźi so slědowaca pohibowanska hra. Jedne dźěćo so wuzwoli a je wišnina. Dokoławokoło njeho połoži kubłarka powjaz, kiž leži znajmjeńša dwaj metraj wot wišniny zdaleny. Nětko postaji wona štyri dźěći. Wone su stražnicy a stražuja nad wišnjemi. Stražnicy smědźa so jenož w kruhu při wišninje pohibować. Dalše štyri dźěći su wišnjowi paduši. Wone hibaja so zwonka tutoho kruha. Hra so započnje, hdyž da kubłarka wotpowědny signal, na přikład z klinčatymi kiješkami. Nětko spytaja paduši wišnje kradnyć a so nimo stražnikow do kruha zadobyć. Stražnicy spytaja jich z rukami při tym zadźeržeć. Hdyž zaso signal zaklinči, je hra nimo. Kelko paduchow bě wuspěšnych?